Hay Nalpuwan di Galiwgiwon (The Origin of the Galiwgiwon)

Handin kanaman ya wada han unga an hay ngadana ya hi Giwon.  Mahmahlu ya mabmabika an umat hinan ibana ya hay udum an u’unga hi bobledad Giwa-giwan.  Inila na’y ngunuh nan payo, ngunuh nan bale ya hay e munhabal ya manganup. Mu agge pinhod pibon amana an pi’piyeyon hi panganupan te gagala pibo on nauwo.

Ta de an umeda bo da amanah nan e panganupan ya alyon da i Giwon di, “Umohohnong a ta tum-tummungo ayun inam te damdama ne an waday imbi’lugna.  Ta wae ha mahapulna ya den wadaa damdama?”

Inalina di ‘o’ omu ni’hapit i  inana an alyona’y, “Ten mabayag met ayay punayyamam ya nungay ta mi’mi’yeya ida ama.”

 Hi inana ya ona pun-inawan di iyanamut Giwon hi makan hiyanan alyonay, “Om eka aya.  Muden adi ta ni’ al-alyon i amam.  Magya nipa’pa’e an nitnud ta die ta dimmatong ayu ya ahi’a mumpatibo ot ngay alyonda aya.”

Nawi’it ya makakda da amana ya nan ongongngal an hi ibbana.  Alyon Giwon idida di, “Udmanyu ama nan balunyu te alina ya wa’y bahhona hi abangngadanyu ya dan adi ayu ma’ganagan.”  Inalinah diyeh te nan nomnomnomona an mitnud.

Den nalimu di bonog da amana i ibbana ot mitnud.  Mipa’e -pa’e hiyana nadan mali’od ta agge tin-tinnibon da amana.  Nungginawadah nan dalan ya matikid mo.  Napu’y liting hi binaluna ya on nauwo.  Nimamah nan atuna ya lo’tat ya adi na mo matibo di bonog da amana.  Ya namaag na hi eye ta inahya matibona dida mu aggena inila di pinluyda.  Lo’tat ya ninomnomnan munbangngad muden di’et waha tinibohna kay wahdi ha kulkulungnge on hinlukna te nunheglay inuwona.  Indani ya bokon kulkulunge’y natigona te han ballu an banniya an nahalibodan ihan wakal ta adi paa’e.  Alyonah nomnomnay “Iyanamut u eh tuwe ya nunheglay amlong ina” 

Mu ninomnomna bo di tugun amana an alyonay, “Nadaaen kakkitang ya adi patayon ta waha umongngal ya waday dumakol.”  Hiya nan namag-ot ahutonay nihikot hi otakna ot hobbatonay nihalibod an wakal.  Ni’dammuy matan di banniya ihiya an umat iha tagu munhana-hana.  Mu talagan nabayag nin an nahuluy banniya ta maid ha bikah nan bumtik.  Munnulele de an mumbakbakahan hinan lutah ya ninomnom Giwon an ununuddon ta alina ya tibona nan ammod tuwen banniya ta hiyay alana.

Palpaliwana ya ihan madamigi an wanti di awadanda ya immawiging di banniya.  Inadi ya minangmang Giwon han kay hoob an hidiy bimmahelan di banniya.  Mu hinawanan han nabilid di limmiodan di banniya “Ta ina  waha baleh nan li’odna ya ta ha liting,” ninomnom Giwon.

Hinumnup hi Giwon hi hoob ya immannung  an wahdi han map-aphodan an bale.  Ta tagtagona ta ha liting.  Mu hinan hoob ya dimmamu day akakkongal an kahu an numpundadaan an mangihabhab hi ngandiye an bumahhel.  Mu wada han immali an alyonay, “Adi! Adi!” ya dimminong day kakahu.

“Dumappuh ah,” an alyon han nunheglay anlan an babai.  Wahdidan umumbundah nan lita’angan ihan ohan lalai yah an unga.

“Hiya nan nangaan peman hinan niputiputa’ an wakal,” dingngol nan alyon nan unga ihanadan kakadwana.  Ay kimmaynit hi Giwon hinan dingngolna te banniya met nan binaddanganah ad uwanindi.

Pinhod nan bumtik te ay nabanni-bannig.  Mu ulay on munggagayonggong ya himmapit an layonay, “On waday litingyu ten nunhegla teyya an nauwoha’?”

Ni’baga an kimmayat nan unga ihan kayiw an wadah nan igid di litangan ot pangtidonay oha nan bungana ot munululen munulu.  Hidiyen bunga ay umat hi kinaongngal du ulun di tagu.  Pangtidona han galutigit ta itwiknah nan bunga ta umayuhan di danum nan bunga.  Idawawana I Giwon an alyonay, “Hituwey inumon mi hituh boble mi.”

Munduwaduwa hi Giwon an mangala te ay kodot nan munayuh nan bunga mu alyon nan babai, “Adi a tumakot an mangala ot hinae nan alyon min galiw.”

Alyon pay bon nan lalai, “He’an ohan maphod di puhuna ya adi da an-anuwon hitun boble mi ad Banago.  Ongal di emi punhana-hanah nangipaptoanam hitun imbabale mi.”

Inalan Giwon di bunga’an ot itoo’ na.  Hidiyey kalumlumiiyan an danum an ena natamtaman.  Indani ya indadaan day mun-atataban habag ihan batawel an nabinahellan ya alyonday, “Te han iyanamutmuh bobleyu.  Hiuwey ipaawelmih kinaap-aphod di puhum.” 

Ta ahi makak ya alyonay, “On mun-odowa’ ya pay hinan galiw ta ahi’ in-inummon hi awon ten ha’on pibo nan nalakan mauwo.”

Hobbaton bon di ungay bulu nan haggon di kayiw ta mangiphod hi tulun tubbung.  Kayatonay kayiw ta mangalah duwan bunga ta ikuyag nay danum na hidi.  Ipiphodnan bobodan ta mabalin an mihaba’lag.  Ipohon Giwon  di nibatawel an munatataban habag ya inhaba’lag nay mainum ot makak.

Handin dimmatong hinan awon an naniganah nan nihabut an ballu an banniya ta wingihonay nalpuwana ya ma’id nan madamigih an wanti an abu han na’holoan an dalan.  Alyona on nuninop mu de met an wahdi nan batawelna an mun-atataba an habag ya nan inhaba’lagna.

Dimmatong hi baleda ya wahdi inanah nan bantag.  Alyonay, “Neyya ot an dakol di tinawangyu!  Mu onda’an ha inyanamutyu iha bung-bungaan.”

“Ma’id, ina,” an alyona.  “Mu wahtu han danum di bung-bunga’an an inyanamut uh.” Uhutonay tubbung, an masdaaw ni’bo te aggena linggiyan te agge na’na’uwo, ta idawawanan inana.

Imminum hi inana pohpohdona.  Hideyey kapolhatan an danum an ena ininum.  Alyona’y, “Dana hudot di nangalam ituwen maappolhat?  On ngay ud danum ituwe?” 

“Hina’e anu nan alyon dan Galiw hi boblen di banbanaggo,” Ot a’apohon pay Giwon di naat ihiya.

Immey atnay algo ya immanamut da amana.  Maid ha inyanamutda te ningamut anun inyadin di duntug hanadan laman ya habag.  Ya alyon Giwon di, “Adi ayu madanagan ama ot neyyahna di mihda.”  Te immannung an deyahdi pay di nabatih nan inyanamutna.

Alyon amanay, “Ot maphod man ta agge daa pinateh inuwom?”

“Towan be’a ama an adiya’ mo hinkitangan on nauwo nipalpuh din ininum u nan galiw,” inhungbat Giwon.

Ta ipatibon Giwon an adimo hinkitangan on nauwo ya imme nangaiw ot mangmanglon.  Tibtibon amana ya de met an adi mo hinkitangan on nauwo.  Alyon amanay, “Ta die bot umeamih duntug ya ni’niyali ah.”

 Hi ibban en Giwon ya dehdin ay bumduk hi annelna nan punhaphappitanan di hinama.  Ta alyonah nomnomna di mahapul an waha atona tapnu duwada lang i ibbana an tumikid hinan duntug ta ipatudduna hin dana di nangalana hinan dakol an habag.  Handin nadatngan di algo an alyon bon amada di umeda manganup ya imme i Giwon ot alyonay, “Alyon ama di mahhun ta anu ta munkappo ta ta ipatibom iha’on an adi hinkitangan on nauwo a!”

Handin inyon Giwon ya immebo I amada ot alyonay, “Imbagan Giwon an mahhun ami ta ipatibona anu I ha’on an adi hinkitangan on nauwo.  Haandon daa din oggantau puniblayan.”

Handin inyon amada ya nakakday hinagi an muntitinnagtag, an munkinkinnappo.  Indani ya nan ongongngal di naatu ya alyona i Giwon di umohnong da.  Handin niblayanda ya inalalu’ na Giwon an alyonay, “Ituddum ya iha’on nan alyom an pangalan hi galiw ten alyon ta’wan inata di mangiyanamut ta anu.”  Maid ayay immathidi hi imbagan inana ihiya mu hay wahdi nomnomya ya ta ahina al-alyon an hiyay nangiyanamut hi maphod an mainum.

“Agge man inila te man nauma nan dalan hidin nibanggada’,” alyon Giwon attog.  Mu adi mamati hi ibbana.

Ni’baga nan inapitwol di Giwon ot itpong nay hinalung.  Ta hi Giwon ya namaagna moy o an inilanay dalan.  Namaagda hi eye ta nipto’ dah din naniganah banniya ya natibo na moy nawatiwat.

 “Deyya nan dalan,” alyona.  Mu hi ibbana ya adina matigo nan dalan.  Gapu ta matigon Giwon di madamigi an dalan ya maphod di pangena mu hi ibbana ya mun-iihahabut.

“On dan hitu ha alyom hi dalan ay?”  Mu namaagna mo unud hinan pangayan Giwon ingganah din natigo dan duway hoob.

Dinamun bon di kakahu dida mu himmapit boy ud bale an kalyonay, “Te numbangngad a tatawwa!  An nganun a numbangngad?  O ya wada pay di adwam?”

“Natala’ ami inale teyya,” alyon Giwon an nunha’ut hinan numpilitan ibbana ihiya.  Imbagan nadan iBanago idida an onha adi lummuh di namaddangan Giwon hinan ibbada ot annamin di mahanawwang hinan awadanda ya ipaahawa damoh nan ibbada ta adida pumbangngadon hinan bobleda te annamin di gummatin hi awandad Banago ya mabalin mon matibo nay wanti an umehdi yaden hay pinhod di i-Banago ya dida ya ammuna di umehdi te tumakut dah e apaiyan di nunhituwanda ya hay tanom an nalmuh di.

“Omu dan ni’ ha inumon mi ya ten tehtun naa’uwo ami?” alyon nan iban Giwon.  Pinhod nan higuladuwon an nan kaiw an tibtibbona ya hiyah diye nan galiw an imbagan Giwon.  Kumayat boy ohah nan i-Banago (an agge mo in-innilan Giwon te habali an aanga din natibo na handi) ta mangala nan bungan di galiw ot idat na dida. 

Hinan pu’on nan kaiw ya wahdi da han kakkita-kitang an buwa.  Alyon nan hi ibban Giwon ihanadan i-Banago, “On hinaye nan buwan tun impainum yu I da’mi?”

“Bokon,” alyonda.  Mu hay wahdi nomnomna ya munha’ha’utda te nan alyona an pangipapto’ dah nunitanom hi nunhituwan.  Hiya nan maggot mabanohboh an kimmabawut ihanadan kakittang an buwa ot mamtik.  Numpudug nadan kahu mu bineletana ingganah ot malimu.

Numbangngadday kahu mu nunheglay takutna te namaag ya nahabalian di nunlio’dana.  Nagadootanbo han ena inwa-inwa an punggalaana inggana ot imatunana han dalan an umeh baleda.  Dimmatong ya wahdi hi inana nan bantag an hadhaddonda dida.

“On da’an hina da amam?” alyon inana.

Nunha’ut hiyana an alyonay, “Man inalan han akakkongal an tatagu hi Giwon.  Te man inako gayam din inyanamutna an hahabag ya danum di bungbunga’an.  Dadiyen nangakawana di nangala ihiya.  Hi amami e ya agge mi natigo.”

Dimmatong hi amada an maid boy inanupna ya numbangngad te minomnoman hi aggena nangakhupan hinan iimbabalena.  Imbagada ihiya nan naappapya an naat i Giwon.  Ya alyon amada di, “Danae nan pipinading.  Aganyu ta ibakian tau  ta itudduday danay pangipabangngadan tau mamanu!”

Inayagan day mumbaki ta atonay atona.  Imme han atnay algo ya wada han hango hinan litaangan.   Tigon di hi ibban Giwon di butongna ya  maid di ginammal an bubuwa.  Nun-iwahwahit gayam hidin tinagtagna an binumtik.  Mu aggena imbagbaga di immanung idadiye an buwa.  Ta hay mumbaki an agge nanginnila ya alyonay, “Haddon tau ya ta tumubu tun tanom te hituwe di mangituddu awadan Giwon.”

Ay napogpog attog di eda punhamakan i Giwon idiyen imbagan di mumbaki.  Mu hi inana ya minonomnom mu ningamut an adina kaya te ongal moy butyugna.  Hae ya abu han maatna ya togtoggadana ya al-alladana di timmubun tanom hinan litaanganda.

Nangey tawon ya mumbakka moy niyayyam an unga an mabalin mon mateynan i amana.  Hae boy tanom ya numbalin kakkakka’iw.   Ta hi inada bo ya alyonan inayanay, “Addaddugam ya hi boo’oy ta tumikida’ ya hi duntug ta ina matibo’ hi Giwon ulay ni’mo on nan lubungna.”

Handin muntikittikid ya tibtibbona on natuntunud di kakkakaiw an ni’yingoy tubuna hinan wahdi nan litanganda.  Ta hay ninomnomna ya un-unuddona e nan nitanoman nadan kayiw ya mahama’ na nan imbabalena.  Mu indani ya napogpog di awadan nan matuntunud ni’ an kakkakaka’iw.  Ta muntukuk an punitkukna di ngadad nan imbabalena.  “Giwon! Giwon!  Wahna a e ya immali ah.”

  Mu ma’id ha humongbat.   Numbangngad hi baleda an on attog mahmahmo’ te ma’id ha inakhupana.  Mu hidiyen pinghana ya naadwa’an.  Naatluan.  Immeh miaapat inggana ot lo’tat ya immingha an wae yon timmikid hinan duntug ta ena hamaon hi Giwon.

Nangey tawon ya immongngal di kayiw.  Ya hiya hi diyen umanne damdama hi inada hinan duntog.  Ya ohan algo ya natigona han banniya an immohnong hinan pu’on di nan maudin kayiw an maakhupana.  Adi bumtik nan banniya an ayna pinhod an paapupu.  Mu dandani ya ahi gagalidut hinan nunlini’odan ay waha dakol hi babanniya an liniod da nan tinibo dan tagu.  Indani ya naba’unut di banniya hinan pu’on di kayiw ya magya nangnge ya nun-itnud dan hiya nan dakko-dakkol an babaniyya.

Nunheglay kolkol di ina ta munihahali’dud an nanganamut.  Impaayag day mumbaki ta ibagada ihiya di naat.  Ya alyon nan mumbaki di “Naen tinibom an banniya ya hi Giwon.”

Lummu idiyen imbagan di mumbaki ya intuluyna an ume-ume hinan nanigana hinan banniya.  Mu ma’ma’id mo ha numpatigo ihiya.  Loh’tat ya nabaket ya nalakayda an himbale ta ma’id mo ha ud kaya idida an tumikid hi duntog.  Alyon dah nan panguluwan di’, “Ekaya ta linah tibom hidiyen banniya!”

Mu hay panguluwan ya munwigiwig an alyonay, “Ekayundi!  On alyo’ nimpey inalan di akkakkongal an towan hi Giwon.  Agge’ pinhod an maat I ha’on nan naat I Giwon.”

Na udidiyan, din niyayyam hi nama’idan Giwon, ya homhom-ona hi inana.  Ta alyonay, “Ina, Ama, ha’on mo di ume manigoh nan alyon yun iba’.”

Imme ya maid ha tinibona hi banniya.  Mu talagan alyonay inggana hi matibona nan ibana ya ahi umanamut.  Ta nangnangngiphod ihan bal-bale hi umohnongana.  Mu maid damdama ha nahhodna hi banniya.  Ohan algo ya tinibona an himmabungday kayiw.  Ya lo’tat ya numbalin an kakkakitay an bunbungaan.  Mu maid pay ha immali hi banniya.  Dimmede’leng day bunbunga’an.  Ya ma’id pay ha tinibona hi banniya.  Ta kayatona ta tamtamana ya malmalumi da nan bunga.  Ta pun pangtid nadan awadan di bunga ta hay alyona ya iyanamutna.  Hinan dalan ya tibtibbona nada nudum an kayiw ya haey udum ya agge bimmunga, ya haey udum ya uwanin munhabung.  Dimmatong hi baleda ta ayagana hi inana an alyona, “Te han inyanamut u an bungbunga’an.”

Tamtaman inana ya alyonay, “Otten athitu din tamtam din inyanamut din ibam an hi Giwon an danum.” 

Nangey algo ya bimmungay wahdi nan litanganda.  Dingngol di nun-ihaggon ta immali.  Wayha on tinamtamanna ya wayha on pinhodna.  Alyonday, “On ngadan udot tuwen bungbunga’an?”

Alyon inada, ten gapu ta ingon di danum an inyamaut Giwon, di, “Hinae nan galiw Giwon.” ( Galiw of Giwon). 

Nan udidiyan ya mamati an hidiye e ya galiw Giwon ta hay ninomnomna ya immannung an wahdi ibbana nan duntug.  Alyona hinan a’ammodna di “Umeya’ ta eya’ mihdi nan iniphod un abung ta lina ya matibo’ hi ibba.”

Agge pinod da amana te nganubot e umiwe ha agge nalahin.  Mu alyonday, “Eka nu hiyay wahnah puhum.” 

Ta makak di udidiyan.  Immeh nan iniphod ababbung.  Ya ginaatanany longya nihnup hinan abungna ta munhabahhabal.  Ohan algo hidin umanamut ya minagmangna han lalai an malmalo’ hinan pu’un di tuud. Mu handin dimmatong ya maid ha tagu an ammuna han banniya an maamtik.  Maggot ilamangna an tinumkuk an alyonay, “Giwon!”

Ya immohnong di banniya.  Indani ya numbalin hi tagu di banniya ya alyonah nan immali ihiya di “Nganun mu udot inila di ngadan u?”

Nunammo an kobkob ya amamlong di nawadah puhon nan udidiyan mu himmapit damdama an alyonay, “Ha’on nan ibam an ha’ey alyon inata ya nibutyuga’ hidin eayu nanganup.”

“Oya odonnona hi ina?”

“Ot nuhegla di iliw nan he’a.  Omman tu e teyyan nangen tawon ya he’ay ena hamahamakon.  Mu de an bimmaketmo ya pati hi ama ya lakaymo.  Ta umanamut ta’  ot ot umamlong da man.”

“Mu adi mabalin an mi’yanamuta’ I he’a te omman he’a inlahinna’ ihan banniya hi ad Banago,” ot ibagana nan immanung an naat.  Gapuh nan inakon nan ibada an buwah ya imbalud di i-Banago hiya.

“On hiyah tuwe tun kayiw?” an inildongna an kayiw an pinangih nay hapang na.  “Omman pinangadanan ina hi galiw mu anu ta Galiwgiwon di pangalida.”

“Hiya.  Omu bokon hinae nan alyon dan galiw ad Banago.  Te hinae e ya tappang di hamuti an hiyay pohdopohdon an anon di i-Banago.”

“Otdan ihiya agge nunnananong di bungot di i-Banago nan ditaun tagu?”

“Handin pinghana ya alyonday tundon da nan ibata ta ilagat day udum hi tagu.  Mu imbaga’ an ulay attog hi’on malahin hinan ibbada mu nan pi’lagat dan patayon di annamin an iiba ya aamod di nanagokoh buwa.  Muden ad uwani ya nahimong ten dimmakol di hamuti hidin dimmakol di niwaat an bungbungaan.”

Ta den ammuna hidiyen nunhapitanda ta munhi’anda.  Galagalan immanamut di udidiyan ta handin dimmatong hi baleda ya nan panguluwan di namangulun ena hinumang.  Amod da munhobang an hinagi an nunheglay bngot di udidiyan hinan inat ibbana.  Mu mumpakumbabay panguluwan an alyonay, “Manue attog ya agge’ pinhod an ahiwawana’ I inatau hi inggana.  Mu man ongal di babawi’ an e nangat idiye.  Ya abigbigat bo damdama ya hihimlo’ an alina ya himmawang hitun litangan tau Giwon.”

Mundongdongol nan hi inada nan puntuktukkan nan hinagi.  Hinumnop idida mu ma’id ha imbagana.  Namaag attog ot iyayyakup na ididan duwa.  Hi unig di puhuna ya amamlong an matmattagu nan imbabalena an hi Giwon mu hi himpangili an boble.

Hinan nihnod an tawon ya bimmunga bo di kaiw.  Limumlumi munan namangulu an bunga.  Gumapu nin ta inadal da an pakawanon di ngandiye man an madmadin naat hinan nala’u, alyon inada.  Intuluydan Galiw Giwon di pangalidah nan bungbungaan panginomnomandah nan ibada an nalahin hi habali.

Gapuh lumiina ya pohdo-pohdon di tatagu hiuwe an bungbunga’an ya punhu-lukday mumuyung ya punkayatda pay di duntug ten eda hamaon di bunga.  Pohpohdon bon damdaman di hamuti ta lo’tat ya nihinap hituwen kayiw hi danaman an nangayan di hamuti.  Inggana as uwani ya alyonday hituwe nan Galiwgiwon an diet timpun di bumungaana on e hamakon di tatagu.

*****
(Condensed English Version)
Legend of the Galiwgiwon

And the youngest child in the family no longer sucked milk from the breast, and so the mother decided to climb the mountain hoping to see even just his garment.  On his ascent he noticed small trees in succession whose leaves are similar to that tree on their yard.  She thought this must be how the tree would lead her to Giwon as told by the mumbaki so she followed the path where she saw growing trees of the same kind lined up along it.   But she soon came to a point where she can no longer leaves of the kind she wants to see ahead.  She shouted for Giwon hoping someone would hear her but no one replied.   She went back home unsuccessful but more determined she was to look for her soon.  The first climb was later followed by a second.  Then a third and a fourth.  Until she regularly goes up to that point of the mountain where line of what she thought were Galiw trees stop. 

Years passed and the trees have grown.  Still the mother continued his regular trip up the mountain.  And one day, she spotted a monitor lizard resting at the foot of the last tree.  The creature did not move even as she came near it as if it wants her to cradle it.  Then suddenly there was some movement of several other lizards around as if ready to attack her.  Then the lizard at the foot of the tree moved away and soon all lizards went away in the same direction.

She told the story when she went back home.  A mumbaki said that lizard she saw at the foot of the tree must be Giwon.  Upon hearing this, she continued her trips up the mountain but she never saw anymore any lizard.  Age soon caught up with her and so with her husband that no one among them had ever went up the mountain again.  The eldest child on the other hand never went up, always talking through that he would not like to be snatched by giants just like what happened to Giwon.  Now the youngest saw the sadness in his mother’s face of not seeing his brother.  He then took the challenge of going up

.

He went and saw no lizard.  He was determined to catch the lizard so he built a small hut near the foot of the tree where he expected the lizard to come, if it were Giwon.  But no lizard ever came.  Soon, it observed that the tree has flowered.  Then the flowers became tiny green fruits.  But still there was no sign of a lizard.  Then some ripened to orange and purple.  Still there was no sign of a lizard.  So he decided to gather the ripe ones and went back home.  He observed along the way that some of the other trees did not bear fruit and some are still flowering.  When he reached home, his mother tasted the fruits and she said, indeed they tasted the same as those juice his son Giwon brought home.  Soon, the fruits of the tree at the yard also yielded fruit.  Neighbors have heard about it and they came to see the new fruit.  When they asked what’s the name of the fruit, the mother says that must be “Galiw Giwon” (Galiw of Giwon).

 

The youngest brother believed that if indeed this were Giwon’s, he must be really up there the mountain.  He informed his parent that he loves to live where he built the hut hoping to one day see his brother.  With a heavy heart, the parents said yes.  One day he saw a man resting under it.  Surprisingly however, there was no one around when he came near it except a monitor lizard trying to run away.  He called out the name Giwon and the lizard stopped.  The lizard became human and they introduced themselves to each other.  The youngest brother told how their mother missed him.  But Giwon told him he cannot do anything because he has been married to a creature of Banago and would never go back to his old home again.  The younger brother asked about the new tree.  Giwon said it was not the real Galiw but was just the bait for wild chickens in Banago.   He told the truth about how their eldest brother stole those seeds and how the creatures of Banago captured him in exchange of the stolen seeds.  Giwon however revealed that soon the creatures of Banago forgave and forgot the thievery as more birds came into their place when the tree which by accident have spread to the land bore fruits and even multiplied.

When the youngest brother came down, he confronted their eldest brother about how he hid the true story.  The eldest explained it was all because of fear that their mother might hate him forever if she knew what he has done to Giwon.  Their mother heard their conversation, did not say a thing and just embraced her two sons.

The next year, the trees bore fruit again.  It was sweeter than their first fruits.  Perhaps it was because they learned to forgive whatever wrong that may have been done in the past, the mother explained.  They continued to call it the Galiw of Giwon in remembrance of the son.

Because of the sweetness, people craved for more and scaled the mountains for it.  The birds do love it too and soon has spread to wherever birds fly. To this day, the fruit is called Galiwgiwon and when fruiting season comes, people go up mountains and forests for its fruits.